Претседателските кандидати се согласуваат дека Иванов нема право да потпише укази за помилување, без да има таква иницијатива од Министерството за правда.
Гордана Сиљановска Давкова, претседателски кандидат поддржан од ВМРО ДПМНЕ рече дека „во моментов е не можно Иванов да помилува“.
„Претседателот може да помилува само во согласност со Закон. Во моментов тоа е не можно затоа што сме во изборна камапања и целата постапка мора да оди само преку Министерството за правда“, кажа Сиљановска во дебатата на ТВ 21.
Претседателскиот кандидат Стево Пендаровски кој е подржан од СДСМ и од ДУИ рече дека без иницијатива од Министерството за правда, шефот на државата не може да помилува.
„Без да се иницира постапка од Министерството за правда, претседателот не може ниту да започне, ниту да заврши постапка за помилување и во тоа ја гледаме злоупотребата кога се помилуваа 56 луѓе со што се предизвика голем народен бунт“, рече Пендаровски и додаде дека „никој не треба да помисли да дава такви помилувања“.
За претседателкиот кандидат Блерим Река кој е поддржан од Беса и од Алијансата на Албанците е беспредметно воопшто да се разговара за помилување.
„Против законско и против уставно е претседателот да помилува, а јас не знам дека Министерството за правда има поднесено иницијатива. Затоа ова прашање го сметам за без предметно е да се коментира“, рече Река.
Од Кабинетот на Иванов цела недела молчат и не одговораат на прашањата на НОВА – колку лица поднесле барања за помилување и дали меѓу нив се и Никола Груевски, Трајко Вељановски, Спиро Ристовски, Миле Јанакиески и Никола Бошковски против кои е отворена истрага со сомнеж дека биле организатори на настаните од 27 април. Од Кабинетот само кусо потврдија дека примиле повеќе барања за помилување на лица осудени за терористичко загрозување на уставниот поредок за случувањата на 27 април.
За насилствата во Собранието на 27 април 2017 година, на 15 март годинава на вкупна затворска казна од 211 години беа осудени 16 лица.
Највисока казна од 18 години доби поранешниот министер за внатрешни работи и екс-директор на Бирото за јавна безбедност, Митко Чавков. Сите осудени лица се во притвор до правосилност на пресудата.