Полицијата на Кенија се судри со демонстрантите на денешните претседателски избори, на местата каде што опозицијата ужива поддршка. Во Кенија се гласа за претседател по втор пат последните три месеци, а кандидатот на опозицијата ги повика своите поддржувачи да ги бојкотираат изборите.
Во градот Кисуму, како што пишуваат медиумите од светот, полицијата употребила солзавец и водени топови за да ги растераат демонстрантите, а блокирани биле и патиштата.
Жителите на Кисуму во знак на протест на изборите, ги бојкотирале гласачките места.
Во главниот град, Најроби, гласањето се одвива според планираното, додека во Кибера, упориште на опозицијата, демонстрантите ја нападнале полицијата со камења.
Бојкотот на опозицијата веројатно ќе резултира со победа за актуелниот претседател Ухуру Кенијата.
Минатиот месец, Врховниот суд одлучи дека победата на Кенијата од 8.август е нелигитимна, откако кандидатот на опозицијата Раила Одинга обвини дека резултатите се наместени електронски.
И покрај тоа што судот одлучи во корист на Одинга, тој на почетокот на октомври се повлече од трката за претседателската фотелја, потенцирајќи дека изборната комисија не работела соодветно.
Овие избори до толкава мера ја поделија земјата, што резултираше со насилство какво што Кенија нема видено од пред 10 години кога најмалку 1.000 луѓе беа убиени.
Откако Кенијата објави победа на 8.август, во неколку судири изминативе три месеци загинаа најмалку 24 луѓе.