Собранието на Република Македонија доцна синоќа ги избра новите министри во Владата: за министерка за правда е избрана Рената Дескоска, за министер за образование и наука Арбр Адеми, за култура Асаф Адеми и за министер без ресор Бардил Даути.
Дескоска беше избрана со 67 гласа „за“ и 23 „против“, Арбр Адеми со 67 „за“ и 25 „против“, Асаф Адеми со 66 „за“ и 23 „против“, а Даути со 65 „за“, 26 „против“ и еден „воздржан“.
Исто така, Собранието избра и четворица заменици-министри: за заменик-министер за надворешни работи е избран Андреј Жерновски, за заменик министер за здравство Асим Муса, за заменик министер за труд и социјална политика Ѓонул Бајрактар и за транспорт и врски Садик Беќири.
– Ве уверувам дека предложените кандидати совесно и со најголема посветеност и одговорност ќе ги извршуваат своите работни обврски и согласно Законот и определбите на Владата на Република Македонија за остварување на програмските определби на Владата и стратешките интереси на Република Македонија и исклучиво во интерес на граѓаните, рече премиерот Зоран Заев пред изборот на новите заменици-министри.
Како нови коалициски партнери во Владата влегуваат крилото на Беса на Африм Гаши и ДПА, кои имаат министерски места, како и Сојузот на Ромите.
На изборот следеше целодневна дебата, по образложението на причините за реконструкцијата од премиерот Заев, што се случи на точно една година од изборот на неговата Влада.
За опозицијата, Владата ако го тргне настрана проблемот со името и ако се осврнат да видат што сработиле, ќе увиди дека ќе види дека речиси и да нема област во која има успех.
Реконструкцијата се прави само за да се задоволат некои нови коалициски партнери.