Во рамките на 111. седница на Собранието, со 55 гласа „за“ и 23 „против“ пратениците го усвоија ребалансот на Буџетот за 2016 година.
Пратениците од опозицијата не гласаа, а претходно на неколкудневната општа расправа по предлогот, пратениците од СДСМ и други опозициски пратеници истакнаа дека не се согласуваат со предложениот ребаланс зашто во него е содржана и еврообврзницата која, според нив, е незаконски издадена, за која пак министерот Кирил Миновски е постојано обвинуван дека извршил кривично дело со неа.
Ребалансот на Буџетот предвидува намалување на вкупните приходи од 177,292 милиони денари на 174,291 милион и на вкупните расходи од 196,276 на 195,472 милиони.
Дефицитот е ревидиран од 18,984 на 21,181 милион денари.
Без расправа Собранието на денешната седница ги донесе и Предлог законот за ратификација на измените и дополнувањата на Конвенцијата за заедничка транзитна постапка, предлог одлуките за објавување јавен оглас за именување на претседател, заменик претседател и заменик член на Комисијата за решавање на жалби во областа на енергетиката, за избор на член на Советот на јавни обвинители и за именување на член на Комисијата на Агенцијата за пошти.
На денешната седница се и неколку ратификации на спогодби на Владата на Република Македонија со владите на Виетнам, Италија и Србија.
Пратениците ќе расправаат и по измените и дополнувањата на Законот за здравственото осигурување, на Законот за градежно земјиште, на Законот за административни службеници и на Законот за спортска академија, сите по скратена постапка.