Вработениот утврдил дека бил измамен и дека во чантата која лицето ја оставило не се наоѓале девизите, туку парчиња хартија кои лицето успеало да ги замени при негово невнимание. По измамникот се трага.
Триесет и седумгодишен гостиварец, вчера (2 февруари) во СВР Тетово пријавил дека околу 13 часот и 40 минути во неговата менувачница на улица „Мајор Чеде Филиповски“ во Гостивар бил измамен од едно машко лице.
Според пријавеното, лицето побарало да купи поголема сума девизи, по што тој му ги подготвил и ставил во чантата, а лицето излегло од менувачницата за да донесе денари. Исто така, според пријавеното, набргу потоа, тој утврдил дека бил измамен и дека во чантата која лицето ја оставило не се наоѓале девизите, туку парчиња хартија кои лицето успеало да ги замени при негово невнимание. Се расчистува и документира случајот. По измамникот се трага.
Неофицијално дознаваме дека станува збор за сума од 10.000 евра.
Од СВР Тетово апелираат:
– Често ги предупредуваме граѓаните да бидат внимателни, особено при зделки со непознати лица кои им сервираат измислени приказни, најчесто за помош за болни лица. Измамниците се многу досетливи и вешти и досега измамија многумина граѓани – велат од СВР Тетово.