Жителите на Сана изјавија дека нападите биле насочени кон области во близина на претседателскиот комплекс, ракетни бази и електрани, објави Ал Џазира. Израелската војска го потврди нападот и рече дека целите во Сана вклучуваат воен комплекс во кој се наоѓа претседателската палата, две електрани и складиште за гориво.
Хутите завчера изјавија дека испукале балистичка ракета кон Израел. Претставник на израелските воздухопловни сили денеска изјави дека ракетата веројатно носела муниција „наменета да детонира при удар“. „Ова е прв пат ваков тип ракета да биде лансирана од Јемен“, рече претставникот.
Хутите напаѓаат бродови во Црвеното Море од почетокот на конфликтот Израел-Газа
Откако војната на Израел во Газа против палестинската милитантна група Хамас започна во октомври 2023 година, Хутите, сојузнички на Иран, почнаа да напаѓаат бродови во Црвеното Море, во она што го опишуваат како акти на солидарност со Палестинците.
Тие често испукуваа ракети кон Израел, од кои повеќето беа пресретнати. Израел одговори со напади врз областите под контрола на Хутите, вклучувајќи го и клучното пристаниште Ходеида.