Екстремно десничарскиот министер за финансии на Израел Безалел Смотрич, преку ноќ одобри планови за решение што би го одвоило Источен Ерусалим од окупираниот Западен Брег, потег за кој неговата канцеларија рече дека „би ја закопал идејата за палестинска држава“, пишува Би-би-си.
Не беше веднаш јасно дали премиерот Бенјамин Нетанјаху го поддржува планот за оживување на долго замрзнатата програма Е1, за која Палестинците и светските сили велат дека ефикасно би го преполовиле Западниот Брег и веројатно би предизвикале меѓународен бес.
Во соопштението насловено „Закопување на идејата за палестинска држава“, портпаролот на Смотрич рече дека министерот ќе одржи прес-конференција за планот за изградба на 3 401 дом за израелски доселеници помеѓу постоечката населба на Западниот Брег и Ерусалим.
Израел ги замрзна плановите за изградба таму од 2012 година поради приговори од САД, европските сојузници и другите светски сили кои го гледаат проектот како закана за секој иден мировен договор со Палестинците.
Досега нема изјава од Нетанјаху или од пошироката влада. Популарноста на Смотрич опадна во последните месеци, а анкетите покажуваат дека неговата партија нема да освои ниту едно место доколку денес се одржат парламентарни избори.
Проектот Е1 би ја поврзал населбата Мале Адумим на Западниот Брег со Ерусалим. Поголемиот дел од меѓународната заедница ги смета израелските населби на Западниот Брег и нивната воена окупација на регионот од 1967 година за нелегални.
Организацијата „Мир сега“, која ги следи активностите за населување на Западниот Брег, соопшти дека Министерството за домување одобрило изградба на 3 300 домови во Мале Адумим.
Планот Е1 е смртоносен за иднината на Израел и за секоја шанса за постигнување мирно решение за две држави. Ние стоиме на работ на бездната, а владата нè турка напред со полна брзина“ – се вели во соопштението на „Мир сега“.
Критичарите на проектот Е1 велат дека тој ќе го подели Западниот Брег, ќе го одвои Источен Ерусалим, кој Палестинците го сакаат како свој иден главен град, и ќе го оневозможи создавањето целосна палестинска држава.
Велика Британија, Канада, Австралија и Нов Зеланд во јуни, воведоа санкции врз Смотрич и уште еден екстремно десничарски министер кој се залага за ширење на населбите, обвинувајќи ги двајцата за постојано поттикнување насилство врз Палестинците на Западниот Брег, јавуваат медиумите.
Велика Британија и други земји рекоа дека Израел мора да престане да ги шири населбите на Западниот Брег. Во текот на изминатите 22 месеци, додека Израел води војна во Газа, групите за човекови права рекоа дека нападите на доселениците и проширувањето на населбите на Западниот Брег се зголемиле.