Според најновите анализи на австралиското Биро за безбедност во транспортот (АТСБ), исчезнатиот Боинг на Малезија Ерлајнс од 2014 година, во водите влетал без никој да има контрола над него, последниот пат кога комуницирал сателитски со надлежните.
– Дополнителните анализи од последните сателитски комуникации од авионот се совпаѓаат со тезата дека авионот нагло се спуштал во тоа време, се вели во извештајот на АТСБ, дополнувајќи дека анализите од удреното крило кое е пронајдено во близина на Танзанија, покажуваат дека проблемот не бил во авионските крила.
Според симулациите на АТСБ, авионот се превртувал во последните моменти паѓајќи со 450 километри на час.
Аналитичарот Џефри Томас за CNN вели, со овој извештај завршуваат теориите дека пилотот управувал со авионот кога авионот влегол во водите.
– Бил надвор од контрола, без гориво и спирално паѓал под висока брзина во водите, заклучува тој.
Боингот 777 на 8.март 2014 година, кратко, откако полета од Куала Лумпур кон Пекинг, ги прекина радиокомуникациите и исчезна, со што настана најголемата мистерија во светот на воздухопловството.
Во големите потраги, околу 20 предмети беа пронајдени од страна на истражителите, но само три се потврдени како дел од летот 370 на Малезија Ерлајнс.
Околу 110.000 квадратни километри досега се покриени при истрагите кои се одвиваат под вода.
Министерот за транспорт на Австралија, Дарен Честер на прес-конференција денеска го потенцираше своето верување дека истражуваат на вистинското место.
– Тоа што не го најдовме авионот досега е фрустрирачко за сите инволвирани, особено за семејствата на патниците и екипажот, изјави тој.
Од денес во наредните два дена во Австралија ќе бидат експерти од Малезија, Кина, Австралија, САД и Велика Британија кои работат на дополнителни анализи со цел да ја решат најголемата мистерија изминативе години.