Судскиот совет на денешната седница зад затворени врати, односно без присуство на медиумите ќе го разгледува извештајот на Министерството за правда за злоупотребите на Автоматизираниот компјутерски систем за управување со судските предмети (АКМИС).
Претседателот на Судскиот совет, Зоран Караџовски рече дека ова е за да се зачува интегритетот на судиите.
Членот на Советот, Влатко Самарџиски побара разгледувањето на извештајот да биде јавно, бидејќи тој е декласифициран и е познат на јавноста, но неговиот предлог беше одбиен од останатите членови.
На седницата присуствува и претседателот на Врховниот суд, Јово Вангеловски.
Извештајот за АКМИС-от беше декласифициран минатиот месец, на барање на Обвинителството и на Судскиот совет, а во него, како што објавија дел од медиумите, кои дојдоа до декласифицираниот документ, било наведено при контролата тогашниот в.д. претседател на скопскиот Кривичен суд, Стојанче Рибарев кажал дека постои двоен АКМИС.
„Во текот на увидот в.д. претседателот на судот Стојанче Рибарев извести дека во судот постои рачна распределба на предмети. При заведување на предметите во надлежност на судија на претходна постапка и на Кривичен совет во одделите кривично полнолетни и организиран криминал не се користел модулот за автоматска распределба на предметите во судот, не биле подесени параметрите за автоматска расрпеделба на предметите во сите претходно наведени уписници, а распределбата на предметите се вршела рачно, која в.д. претседателот на судот Стојанче Рибарев ја нарече дупли АКМИС“, било наведено во извештајот.
Во него е нотирано и дека конкретни предмети од еден судија се давале во работа на друг судија, а судии биле „вадени“ од АКМИС по разни основи, само со параф на претседателот на судот.