Тела на маж и жена беа извлечени утрово од хотелот во Италија кој го поклопи лавина, со што бројот на жртвите се искачи на 29 лица.
40 луѓе беа во хотелот Ригопиано во Абрузо кога на 18 јануари се урна лавина тешка 120.000 тони со брзина од околу 100 километри на час. 11 лица, вклучувајќи и деца, беа извлечени живи.
Премиерот Пауло Џентилони призна дека локалните власти не ги зеле сериозно извештаите за опасност од лавина. Но, тој вчера во Парламентот рече дека сега не е време да се бара жртвено јагне за катастрофата.
Неколку од жртвите починале од физички повреди, а дел имале знаци на телата од хипотермија.
Џентилони рече дека во тек е истрага за несреќата. Сомневањата упатуваат кон кабинетот на префектот на Пескара кој не реагирал соодветно на повиците за помош на две лица кои успеале да избегаат од хотелот.
Спасувачите стигнаа до местото неколку часа подоцна. Тие дотаму се пробиваа пешки бидејќи патот беше блокиран од огромни наноси на снег.