Со СМС порака и наводно јавување на телефон, лидерот на ВМРО-ДПМНЕ, Христијан Мицкоски вршел притисок врз лице во Одделот за внатрешна контрола во МВР за прекинување на истрагата за случајот „Теретана“, пренесува порталот sdk.mk, кој се повикува на извор што не е овластен да дава информации за јавноста.
Истрагата, како што се вели во текстот, не е насочена за тоа што теретаната била специјално отворена за лидерот на опозицијата наводно во време на најстрога забрана, бидејќи тоа е домен на јавна безбедност, туку за присуство на тројцата обезбедувачи од МВР во придружба на Мицкоски. Видео-снимката од празната вежбална на која се гледа Христијан Мицкоски и лицата од обезбедувањето кои носат гумени ракавици, беше објавена на социјалните мрежи на 25 април.
Дополнителната заменик-министерка за внатрешни работи, Славјанка Петровска во синоќешното гостување на ТВ 24 рече дека истрагата за случајот „Теретана“ сè уште не е затворена, бидејќи не е утврден точниот датум од кога потекнува снимката на која се гледа Христијан Мицкоски како посетува теретана.