Најголем дел од канцелариите на извршителите денеска беа затворени во знак на револт од најавениот Предлог тарифник на Министерството за правда со кој се намалуваат максималните награди од 1.000 на 300 евра. Одлуката да не работат се однесува само на денешниот ден, од утре ќе продолжат по старо. Тие реагираат дека ќе се соочат со финансиски проблеми во работењето доколку новите тарифи бидат усвоени на една од наредните владини седници. Една од последиците, според нив, ќе биде отпуштање на вработени, а другата што ја акцентираат е ставање клуч на канцелариите.
Намалувањето на наградите за 70 отсто, според претседателот на Комората на извршители, Зоран Димов, е неприфатливо и ќе значи неиздржливост во дејноста и побара средба со Министерството за правда и со Владата за разговор и изнаоѓање на компромисно решение.
„Има извршители кои едвај преживуваат, има извршители кои и немаат толку голем обем на работа. Отворени сме за разговори со Министерството и Владата со намера да најдеме компромис“, порачува Димов кој нагласи дека со предложениот тарифник по вторпат ќе бидат намалени наградите за извршителите.
Некои од нив, пак, истакнуваат дека ќе бидат принудени не само да отпуштат вработени, туку и да ги затворат своите канцеларии. Од Министерството за правда, пак, посочуваат дека се разгледуваат сите опции за обезбедување на правичност во извршувањето.
Извршителите се под голем удар во јавноста, од граѓаните и, особено, од неформалната организација „Стоп за извршителите“ чии претставници секој вторник протестираат пред Министерството за правда. Тие со поинаков став за работата на извршителите и понуда помош, ако е потребно, „за затворање на нивните канцеларии“.
„Стануваат нервозни. Тоа е очигледно. Народски речено, се ближи крај на нивниот проект за жетва на пари и не знаат што да прават. Апелираме до Владата да ги врати на работа во судовите и да работат за плата како сите ние. Граѓаните постојано се обраќаат до нас да дадат поддршка за омасовување на протестите. Меѓутоа денеска се воздржавме и оставивме простор тие да протестираат. Велат дека сакале да затвораат канцеларии, ние сме тука ако им треба помош“, вели Маријан Ристески од „Стоп за извршителите“.
„Стоп за извршителите“ организира неколку протести во изминатиот период. Нивните барања се однесуваат на запирање на трендот на блокирање на сметките на граѓаните, што е оценето како незаконско, противуставно и спротивно на Декларацијата за човекови права, но и процес на ветинг за извршителите.