видеото е во сопственост на порталот А1Он
Според екс-министерот за транспорт и врски, Миле Јанакиески, прес-конференцијата на Специјалното обвинителство била без аргументи.
– Без никакви, ама баш никакви основи, ниту презентирани документи, вели Јанакиески.
Според него, целта на СЈО била во соработка со СДСМ да влијаат на изборите и силната поддршка на неговата матична партија.
– Целта на СЈО е во соработка со СДСМ да влијае на изборите, но граѓаните на Република Македонија тоа ќе го препознаат и ќе дадат силна поддршка на ВМРО-ДПМНЕ. Очекуваме СДСМ и СЈО и во иднина да продолжат со оваа хајка против членовите на ВМРО-ДПМНЕ , додаде тој.
Тој потенцираше дека договорот за Сончев град не бил раскинат поради грешки на комисијата на Министерството за транспорт и врски, туку поради тоа што имало грешка во постапката од страна на Општината Сопиште.
– Комисијата што се формира во Министерството за транспорт и врски за спроведување постапка за оттуѓување градежно земјиште го има истото направено во согласност со законот. Договорот воопшто го нема раскинато Министерството за транспорт и врски поради грешките на комисијата, туку тоа се има случено врз база на одлука на Уставен суд, а тој утврдил дека има грешка во постапка од страна на Општината Сопиште. Министерството воопшто нема склучено спогодба како тоа што беше презентирано од СЈО. Имено, склучена е судска спогодба од страна на државното правобранителство, која содржи решение дека средствата треба да се исплатат, објаснува Јанакиески.
Јанакиески е обвинет во случајот на СЈО за насилствата пред Општина Центар за време на протестите во јуни 2013 година. Тој, исто така, е осомничен во истрагата на СЈО „ТНТ“ за уривањето на комплексот „Космос“ на бизнисменот Фијат Цаноски.
Миле Јанакиески, исто како и министерката за култура Елизабета Канческа-Милевска, обвинуваат дека мисијата што СЈО си ја поставило пред себе не е да се спроведува правда, туку политичка хајка против ВМРО-ДПМНЕ.