Во Основниот суд Скопје 1 за денеска е закажано рочиште за предметот на СЈО „Топлик“, во кој осомничени се шест лица, меѓу кои и поранешниот министер за транспорт и врски Миле Јанакиески за продажбата на градежна парцела во скопско Сопиште.
Во овој случај првоосомничениот, како раководно лице во Министерството за транспорт и врски, спротивно на Законот за јавни набавки составил Комисија за јавни наддавања на која и наложил да избере понудувач за купување и располагање со државно земјиште за изградба на елитниот комплекс Сончев град во Сопиште, иако фирмата не ги исполнувала условите за тоа.
Од доказите, според СЈО, произлегува дека поради раскинувањето на договорот по вина на Министерството, Министерството се обврзало во износ од 1 милион евра да му исплати долг и затезна камата на правното лице „Сан сити“.
Судот во овој предмет во предвид ќе може да ги земе и телефонските прислушувани разговори како докази по предлог на СЈО.
Според СЈО постои основано сомнение дека во периодот од 3.4.2007 до 18.2.2013 година во Скопје, првоосомничениот како раководно службено лице од Министерството за транспорт и врски и пет осомничени службени лица, членови на Комисијата за спроведување на постапка за јавно наддавање при Министерството, како соизвршители, ја искористиле својата службена положба и иако биле потполно свесни дека поради нивното дејствување може да настапи штетна последица, сепак, се согласиле со нејзиното настапување, па нанеле штета на средствата од буџетот на РМ во износ од 1.044.000 евра.