Published: Friday, October 21, 2016 20:35
По вчерашното отворање постапка против министерката за култура Елизабета Канческа-Милевска со предметот “Тендери” и прес конференцијата на Милевска, вечерва на ТВ Телма Специјалната јавна обвинителка Катица Јанева изјави дека министерката треба самоиницијативно да дојде во СЈО и да ги донесе сите докази за кои смета дека се валидни и ја докажуваат нејзината невиност.
Јанева исто така рече дека ќе покрене кривични пријави против повеќе лица кои не постапувале по судските наредби и ја попречувале истрагата на истражителите и обвинителите при претресот во Управата за безбедност и контраразузнавање (УБК).
Според неа во изминатите 48 часа СЈО ги документирало сите обиди на УБК да се попречи правдата и да не се почитуваат двете судски наредби со кои СЈО побара одземање на докази од УБК поврзани со компјутерскиот систем за прислушување и документи за посебните истражни мерки.
Повеќе лица ќе добијат кривични пријави:
„Не се само тројца, повеќемина се и ќе поднесеме кривични пријави кога ќе оцениме дека е време за тоа“, одговори таа на прашањето дали кривични пријави ќе бидат поднесени против директорот на УБК Владимир Атанасовски, директорот на Бирото за јавна безбедност Митко Чавков и дополнителниот заменик министер за внатрешни работи Оливер Андонов.
