Претседателот на Советот на Јавни обвинители Антонио Јолевски вели дека во неколку наврати досега барал ова тело да има поголеми надлежности во врска со санкционирањето на обвинителите кои се огрешиле во својата работа ,откако неодамна двајца обвинители се суспендирани, а други двајца ќе добиваат помала плата во наредните четири месеци.
Станува збор за обвинители од Скопје, Тетово, Битола и Ресен, а во тек е и постапка против обвинител од Охрид.
Јолевски за Нова ТВ вели дека за ова прашање неодамна разговарал и со министерот за правда Никола Тупанчевски затоа што очигледно треба да се внесат измени во законот, со кои Советот на обвинители би имал самостојност во одлучувањето кога станува збор за сомнежи или за констатирано несовесно работење на обвинителите, по примерот на Судскиот совет кој има ингеренции да решава за работењето на судиите. Советот на обвинителите, како што објаснува Јолевски, утврдува престанок на функцијата јавен обвинител и одлучува, но во втор степен во постапката за утврдување на дисциплинската одговорност на јавните обвинители.
– Советот се залага сите јавни обвинители кои го прекршиле законот да бидат разрешени, односно против нив да се поведе постапка. Според законот дисциплинската постапка ја води Основното јавно обвинителство, тоа е првиот чекор. Потоа, ако членовите на таа комисија утврдат дека треба да се преземе дисциплинска мерка или разрешување тој предлог го поднесуваат до Советот, но ние не можеме да постапуваме самостојно, вели Јолевски.Обвинителството (ОЈО) во текот на дисциплинската постапка не открива повеќе детали за обвинителите за кои има преставки, освен што информира дека државниот јавен обвинител донел решение за оддалечување од функцијата на скопски јавен обвинител, додека трае дисциплинската постапка против него, поради основано сомнение дека сторил тешка дисциплинска повреда од член 91 став 1 алинеја 8 од Законот за јавното обвинителство.
„Фокус“, неофицијално објави дека станува збор за скопскиот обвинител Миле Арсениевски, кој наводно не постапувал по предмети кои се однесувале на сообраќајки, а според Обвинителството, скопскиот обвинител во дел од предметите кои му се доделени не ги презел неопходните дејствија согласно Законот за кривична постапка поради што настанало пролонгирање на постапката или застареност на кривичното гонење.
Обвинителството исто така донесе решение за оддалечување од функцијата на тетовската обвинителка Лејла Кадриу, но оттаму не откриваат кои се причините за тоа се додека дисциплинската комисија и Советот на јавни обвинители не донесе одлука.
С.М.