Поранешниот дефанзивец на Монако, на Рома, на Фулам, на АПОЕЛ и на Ливерпул, Јон Арне Рисе (38) издаде автобиографија со наслов „Running man“ во која објавува детали од приватниот живот, но и непријатности со дел од колегите во професионалната кариера. Во дел од книгата, Норвежанецот пишува за дивјачки напад од некогашниот соиграч во Ливерпул, Крег Белами во португалскиот град Алгарве во 2007 година каде „црвените“ се подготвуваа за осминафинална пресметка против Барселона во фудбалската Лига на шампиони.
„Една вечер бевме во клубот и некои фудбалери почнаа да пијат алкохол. Набрзо на масата на која седев се најде микрофон. Белами во тој момент почна да вика на цел глас крај уредот за караоке – „Рисе ќе пее, Рисе ќе пее“. Уште тогаш беше прилично пијан, а јас нервозен. Не се откажуваше, па пријдов до него, му реков „нема да пеам, престани, инаку ќе го претепам. Тоа дополнително го вознемири и почна да вика „Ќе те убијам“. Буквално се дереше на мене“, наведува поранешниот норвешки фудбалски репрезентативец.
Но, сцената од клубот имала „трето полувреме“. Велшанецот не можел да се помири со исходот и одбивањето на Рисе, па Норвежанецот продолжува:
„Среде ноќ се разбудив во мојата соба. Крај креветто стоеше Белами со палка за голф во рака. Во близина беше и неговиот цимер Стив Финан. Замавна со сета сила сакајќи да ме удри во потколеницата што сигурно ќе значеше крај на кариерата. За среќа успеав брзо да ја тргнам и да го избегнам ударот. Станав од кревет, а Белами почна почна да вика „Не ми е гајле дали ќе завршам во затвор, ќе те убијам“. Потоа ме удри двапати, по еднаш на страна и во колк, но не почувствував ништо бидејќи бев полн со адреналин. Во секој случај можеше сериозно да ме повреди“, открива 38 годишниот Рисе.
Рисе мина седум години во дресот на Ливерпул (2001-2008). За „црвените“ од „Енфилд“ одигхра вкупно 234 меча и постигна 21 гол.