Доминација на американските тенисерки во завршницата на Ју-Ес опен. По Венус Вилијамс и Слоун Стивенс, Коко Вандевеј е третата домашна претставничка што се избори за полуфинале на последниот гренслем во сезоната. Дваесеттата носителка во четврт-финалето ја елиминира првата, Каролина Плишкова со 7:6, 6:3 за најголем успех во нејзината кариера.
„Ајде да бидеме четири од четири“, се обрати 25 годишната њујорчанка кон фановите по големата победа на чешката ривалка алудирајќи на сонародничката Медисон Киз која во последното четврт-финале ќе игра против Естонката Каја Канепи.
Евентуален триумф и на Киз ќе значи и прв американски квартер на женскиот дел на турнирот по 1981 година кога полуфиналистки беа Трејси Остин, Крис Еверт, Мартина Навратилова и Барбара Потер.
„Секогаш сонував да бидам на големата сцена. Поголемо нешто не можев да посакам“, додаде Вандевеј која падна на колена по сервис бомбата (103 км./ч.) што ја активира во втората меч топка, а Плишкова беше немоќна да возврати.
Вандевеј во полуфиналето ја чека подобрата од мечот Киз – Канепи. Втората полуфинална двојка кај девојките ја формираа Венус Вилијамс и Слоун Стивенс.