Обвинетите за насилствата во Собранието на 27 април, Јане Ченто и Игор Југ му поставуваа прашања на поранешниот претседател на Собранието Трајко Вељаноски кој денеска сведочи за крвавиот четврток.
Обвинетиот Јане Ченто го праша Вељаноски дали, ако не беа отворени вратите во Собранието, масата ќе можеше да влезе, но Вељаноски не даде конкретен одговор.
Ченто праша и дали некој го известил Али Ахмети да замине од Собранието затоа што знаел дека нешто ќе се случува, Вељаноски кажа дека тој ден само Ахмети не бил во Собрание. Ченто исто така праша и дали виновник за она што се случувало на 27 април се политичките елити кај кои, како што рече не преовлада разумот за мирна транзиција на власта за да си ги заштитат удобните фотељи, Вељаноски рече дека не може како сведок да одговори на ова прашање.
Обвинетиот Игор Југ праша дали пеењето на албанската химна било увертира за крвавиот четврток, а Вељаноски одговори дека тој ден имало многу настани.
„Не беше само еден настан тој ден, беше пресот на Заев и други настани и не мислам дека немилите настани беа предизвикани од само еден настан“, рече Вељаноски.
Игор Југ исто така праша: „Дали ние што скапуваме по затвори бевме куклите, а политичарите беа господарите кои ја водеа играта“?.
Вељаноски не одговори прецизно, но се согласи дека „политиките ги водат политичарите“.
„Сите си ги извлекоа своите од затвор и сега останавме само ние жртвените јагниња“, кажа Југ.