Претседателот на Европската комисија, Жан-Клод Јункер, понуди пет можни сценарија за иднината на Европската Унија до 2025 година, кои се замислени како подлога за расправа во текот на оваа година, а не како готови решенија.
Јункер во Европскиот парламент претстави „Бела книга“ за иднината на Европа: размислувања и сценарија за ЕУ27 до 2025.
Јункер во својот говор рече дека досега расправата за иднината на ЕУ често водела во смисла на дилема „помалку или повеќе во Европа“, односно цврста или лабава унија, но дека таков пристап е погрешен.
Петте можни сценарија претставени во Белата книга се следни: да се задржи „статус кво“, ЕУ само како единствен пазар, Европа со повеќе брзини, ЕУ со помалку овластувања, но поефикасни, ЕУ која во повеќе подрачја ќе работи заедно.
За предложените сценарија треба да се изјаснат земјите членки, што не треба да се очекува пред да завршат многу важните избори во Холандија, на 15 март, потоа во мај претседателските избори во Франција, како и во септември парламентарните избори во Германија.
Јункер во својот говор за состојбата на Унијата во 2017 пред Европскиот парламент треба да ја резимира расправата и размислувањата на државите членки, а на самитот во ноември да се формулираат првите заклучоци.
„Белата книга“ е придонес на Комисијата за самитот кој се одржува во март во Рим. На тој самит би требало да почне процес на кој 27-те земји би требало да донесат одлука за иднината на Унијата.
Јункер најави дека Комисијата следните месеци ќе објави низа документи кои треба да послужат како подлога за расправата. Станува збор за документи кои ќе се однесуваат на: развој на социјалната димензија во Европа, продлабочување на интеграциите во економската и монетарната унија, документ за штетните последици на глобализацијата, како и за иднината на европската одбрана и иднината на европските финансии.