Ниту еден компромис за 15 години не беше доволен ЕУ да го исполни ветувањето. Значи, жртвата која Владата на Зоран Заев ја поднесе, беше залудна. На тој начин, ЕУ ја остави Македонија на цедило, ги изневери очекувањата и не ги исполни не само ветувањата, туку и јасните обврски, пишува „Јутарњи лист“

Европската Унија изневери многу држави, но една речиси уништи. Неспорно е дека за евентуални нови тензии во државата и политичката нестабилност одговорноста ја сноси и Европската Унија, пишува во денешното издание  „Jutarnji.hr“, коментирајќи ја оставката на премиерот Зоран Заев по вториот круг од локалните избори коишто се одржаа во неделата.

Весникот потсетува дека „ЕУ веќе два дена не реагира на новонастанатата ситуација во Северна Македонија“.

– Може да се разбере и ставот дека не коментираат резултати од избори, особено локални. Но оставката на премиерот ја менува целокупната политичка ситуација, не само во Македонија, туку и пошироко, пишува „Јутарњи“.

– Претседателот на Владата на Македонија, односно Северна Македонија (таа држава беше принудена да го промени и името, надевајќи се дека ќе се отворат вратите за интеграција во ЕУ), Зоран Заев, поднесе оставка, откако неговата партија доживеа тежок пораз на локалните избори. На прв поглед, тоа се чини како разумен чин, доказ за чувството за одговорност за неуспех, што и не е некоја карактеристика на политичарите на Балканот. Лидерот на партијата е најзаслужен кога се победува, но и најодговорен кога се губи. Но, оставката на Заев има значително поширок контекст, оценува „Јутарњи лист“.

Оставката, како што додава весникот, доаѓа во време кога на С Македонија уште еднаш и е блокиран патот кон ЕУ. Овојпат „тоа го стори Бугарија со која се спорат околу идентитетски прашања, вклучувајќи ја и етничката припадност на некои историски личности. На пример, дали Гоце Делчев е Македонец или Бугарин“.

– Одговорот на ова прашање во моментов е најголема пречка во процесот на проширување на ЕУ. Не само за Северна Македонија туку и за Албанија, бидејќи ако Бугарија ја блокира Македонија, тогаш некои други држави не се согласуваат пристапните преговори да се отворат со Албанија. И така, целиот процес стои, коментира „Јутарњи“.

– Ако на Германија и на Франција навистина им значеше да дојде до отворање на преговорите, тоа и ќе се случеше. Ќе се најдеше начин да се одоброволи Бугарија сега да се отворат преговорите, а во текот на процесот да се решат отворените прашања, пишува весникот.

– Ниту еден компромис за 15 години не беше доволен ЕУ да го исполни ветувањето. Значи, жртвата која Владата на Зоран Заев ја поднесе, беше залудна. На тој начин, ЕУ ја остави Македонија на цедило, ги изневери очекувањата и не ги исполни не само ветувањата, туку и јасните обврски.

Во кометарот на весникот се нагласува:

– ЕУ досега разочара и други држави, но ниту една како Северна Македонија. Во почетокот на 21 век, Македонија беше првата од државите од регионот на патот кон ЕУ, пред Хрватска. Прва имаше склучено Спогодба за стабилизација и асоцијација. И додека Хрватска го заврши патот кон членството и влезе во ЕУ пред повеќе од осум години, сега С Македонија се уште чека на првиот чекор –  отворање на преговори, наведува „Јутарњи“.

– Европската Унија досега побара од Македонија, но и од сите земји-кандидати или потенцијални кандидати, реформи, борба против корупцијата и исполнување други услови. Во меѓувреме, поранешниот македонски премиер Никола Груевски, обвинет за корупција, доби азил во ЕУ, од кадешто доаѓа актуелниот комесар за проширување. Има многу апсурди во односите меѓу ЕУ и Северна Македонија. Но, несомнено е дека за евентуални нови тензии во земјата и за политичката нестабилност одговорност сноси и Европската Унија, заклучува „Јутарњи лист“.