Иако сезоната сè уште е незавршена, а до почетокот на преодниот рок има време, во Јувентус, сепак, влечат внатрешни потези. Старо-новиот италијански првак и финалист во Лигата на шампиони обезбеди два нови потписа од постоечкиот кадат. Ја продолжи соработката со Марио Манџукиќ и го откупи договорот на Хуан Квадрадо од Челзи.
Хрватскиот репрезентативец беше обврзан на верност до летото во 2019 година, но клубот му понуди нов договор за дополнителни 12 месеци што напаѓачот, секако, го прифати. Финансиски детаљи од договорот не се обелоденети.
„Исклучително сум среќен што мојата авантура во Јувентус ќе продолжи. Отсекогаш го давав максимумот во дресот на овој клуб, а така ќе биде и во иднина“, рече Манџукиќ по објавата на веста на клупскиот Твитер налог.
Манџукиќ пристигна во Јувентус од Атлетико Мадрид во 2015 година. Од тогаш настапи во 84 меча за „старата дама“ и постигна 23 гола.
Клубот од Торино во истовреме го откупи и комплетниот договор на Хуан Квадрадо (28) за што на Челзи му плати 20 милиони евра. Колумбиецот парафира тригодишна соработка со „бјанконерите“, откако две сезони мина меѓу нив како позајмен играч од лондонските „сини“. Во Италија, претходно, настапуваше и за Фиорентина.