Новинарка од босанскиот медиум „Журнал“ успеала да се стекне со диплома од средното медицинско училиште во Сански Мост за само две недели, а притоа не присуствувала на ниту еден час.
Откако на 20 декември минатата година ги предала документите, новинарката Азра Омеровиќ „завршила“ училиште и добила диплома со свидетелство за сите четири години со многу добар успех на 3 јануари.
На дипломата на Медицинско училиште од Сански Мост пишува дека ученичката Азра Омеровиќ запишала „преквалификација” на 22 ноември 2016 година, а дека успешно го завршила образованието на 15 ноември 2018 година.
Според свидетелството, успешно положила анатомија и физиологија, хигиена со здравствена заштита, микробиологија, медицинска психологија, заразни болести, патологија, хирургија, фармакологија и дека обработила и практична настава.
Приказната започнува во ноември минатата година, кога редакцијата „Журнал” добила документација од полициски и правосудни агенции во која се наведува дека на подрачјето на Федерацијата Босна и Херцеговина се продаваат дипломи од средни училишта и сето тоа има врска со Центарот за образование од Широки Брег, поддржани од страна на бизнисмени блиски до Хрватската демократска заедница (ХДЗ) во БиХ.
Документите покажуваат дека парите од Широки Брег биле користени за основање на средношколски и високообразовни институции во БиХ и дека во овие установи издаваат сомнителни дипломи. Се наведуваат имиња на посредници кои работеле во одредени градови и кои за пари набавувале дипломи.
За сараевскиот регион, бил одговорен извесен Сенад Пеливановиќ од Фојница. Омеровиќ со него имала кус телефонски разговор, а првпат се сретнале во Сараево.
Како што ` било кажано во училиштето, за преквалификација е неопходно најмалку една година, меѓутоа, Пеливановиќ можел да го обезбеди тоа многу побрзо за сума од 2.500 конвертибилни марки (околу 1.200 евра) наменети за „директорите и другите”.
На средбата со Пеливановиќ, новинарката одбила да му даде пари однапред, а тој ` рекол дека ќе мора да „бара алтернативни решенија” и дека овојпат нема да оди преку Широки Брег.
На истата средба, новинарката добила „специјален телефонски број” наменет за договори околу дипломите. Редакцијата на „Журнал” дошла до листа на повици што докажува дека Пеливановиќ од тој број единствено го контактирал Центарот за образование од Широки Брег.
Пеливановиќ тогаш на новинарката и рекол дека до 15 јануари ќе добие диплома за средно медицинско училиште на нејзино име.
Омеровиќ на 2 јануари, во 14:46, добила порака од Пеливановиќ дека сé е готово, а предавањето на дипломата било закажано за 3 јануари.
Тој на 3 јануари се појавил на закажаното место со свидетелства и дипломи за завршено Медицинско техничко училиште од Сански Мост – заверени, со воден печат и јасни потписи, како и со оценки што новинарката никогаш не ги добила.
По примо-предавањето, новинарската екипа му се претставила на Пеливановиќ, а сè било снимено.
Господине Пеливановиќ, за жал, не сте уапсени. Ние ова го направивме само за да покажеме дека го правите ова. Само сакавме да покажеме дека ова се прави и дека обвинителството молчи, му порача на Пеливановиќ еден од колегите на новинарката Азра Омеровиќ.