Тренерот на Манчестер јунајтед, Жозе Мурињо размислува за забрана на неговите играчи да ја поминат божикната вечер со семејствата. Според „ Сан“, португалскиот стручњак закажал тренинг вечерта на 25 декември како еден вид на казна за „црвените ѓаволи“ за лошите партии во последниот период.
Во претходните години, на 25 декември, фудбалерите на Јунајтед имаа само лесни утрински часови, по што си заминуваа дома на прослава на Божик. Мурињо не е задоволен од ангажманот на фудбалерите и затоа има намера да ги казни со дополнителен тренинг, објави англискиот медиум.
Ова доаѓа по поразот на Манчестер Ј. од Валенсија (1:2) на гостувањето во Шпанија во последното коло од групната фаза во Лигата на шампиони. Таквиот исход на „Месталја“ не се одрази врз основната амбиција на премиерлигашот да се пласира во нокаут фазата со оглед дека мисијата беше дофатена уште во претходното коло. Но, „специјалниот“ не е задоволен од залагањето на фудбалерите во исполнување на обврските имајќи ги предвид предизвиците што надоаѓаат и во домашното првенство и со ваквата мерка што ја планира сака да го задржи нивниот фокус.