Владо Камбовски и Гордан Калаџиев, ги вкрстија „копјата“ околу идејата на лидерот на ВМРО-ДПМНЕ, Христијан Мицкоски, да се формира тим од експерти во кој би партиципирале и тие, а кој  треба да работи на изготвување на законот за јавното обвинителство. Камбовски не се согласува, за Калаџиев таа е прифатлива. Камбовски за ТВ24 вели дека тој веќе ја води работната група формирана од Министерството за правда која работи цела година токму на законот за Јавно обвинителство и сите предлози таму се добредојдени. Но, според него нема логика шестмина професори, иако од Правниот факултет, сепак од различни области, да седнат и да напишат закон кој се однесува на јавнообвинителската фела.

„Јас ја водам таа работна група формирана од Министерството за правда и работеше цела година, со учество и на експерти кои доаѓаа од надвор и тоа се одвиваше во рамките на ОБСЕ, учествувавме ние поголем дел од академската заедница, но и од Јавното обвинителство кои треба да бидат најповикани да ги дадат идеите. Еден закон кој што се однесува на една исклучително важна фела како што е Обвинителството, не може да биде професорски закон. Мора да продолжи работата во таа работна група и секој што има предлози нека ги поднесе, таа работна група ќе се состане, таму мнозинството се професионалци кои цел живот работеле во Обвинителството. Немам ништо против предлози. Тоа таму е континуирана работа. Не се согласувам со таа идеја, бидејќи  веќе се работи на тоа законско решение на кое потрошивме многу енергија“, вели Владо Камбовски за ТВ 24, во врска со предлогот на Мицкоски покрај тој и Калаџиев и Гордана Силјановска, Никола Тупанчевски, Тања Каракамишева и Гордана Лажетиќ да изготват нов закон.

Професорот на Правен факултет, Гордан Калајџиев, пак, вели дека е прифатлива идејата која опозицискиот лидер вчера ја објави на прес-конференција. Калајџиев вели тоа е всушност негово барање, експерти да сработат таков клучен закон, со цел да се тргнат политичките наслаги кои предизвикуваат општа конфузија во општеството.

„Јас сум се залагал за тоа да го сработат експерти, а не политичари и уште лани во декември таков закон беше готов. Тоа е моја идеја за која се залагам подолго време. Овој закон кој е предложен се наполни со погрешни содржини. Според мене законот без идејата за СЈО нема реформи, планирано беше СЈО да стане трајна институција и тоа требаше да влезе во законот. Но, мотивите не беа толку благородни, се изманипулира да го снема ставот за рокот на истрагите, па потоа си додадоа делови да ги овековечат истрагите, па да се регулира дали е се доказ или не. За жал политичарите продаваат магла, а новинарите кои се нестручни, додаваат нова магла. Потребно е да се тргнат сите политички наслаги кои прават конфузија и нанесуваат проблеми во правниот поредок. Јас и не им ја гледам многу ни смислата со секакви предлози да се излегува, повеќе би рекол дека е од инает е отколку да има вистинска смисла законското решение“, смета Калајџиев.