Претседателот на Судскиот совет, Зоран Караџоски на денешната прес-конференција, се пожали дека медиумите вршеле притисок врз судската фела и дека било каков притисок од страна на медиумите врз судиите било спротивно на барањата на меѓународната заедница, како и прекршување на меѓународните и на домашните стандарди.
Ова тој го изјави на денешната прес-конференција на која беа поканети и амбасадорите од меѓународната заедница а кои не дојдоа. Одговорајќи на новинарско прашање, дали тоа е знак дека тие не се согласуваат со начинот на кој судството функционира, Караџоски порача дека прашањето требало да биде упатено до нив.
– Правиме обид да го зачуваме сопствениот интегритет како судии и интегритетот на професијата, затоа што се прават обиди за оцрнување на нашиот општествен углед. Апелираме сите да се воздржат, изјави Караџовски, дополнувајќи дека судството во Македонија е назависно и нема никакви спреги меѓу владејачката партија и судиите.
Речиси секое новинарско прашање адресирано до него, претседателот на Судскиот совет го оценуваше како „несериозно“ и дека дел од прашањата биле политички констатации на новинарите.
Првиот човек на Советот, појасни и дека се почувствувале загрозени со тоа што СЈО повикало пет судии на распит од Управниот суд.
Претходно, Специјалното обвинителство задолжено за расчистување со индициите за криминал кои произлегоа од бомбите, во истрагите објави дека поведува постапка против Советот во Управниот суд кој направил злоупотреби при одлучувањето за изборите во Општина Центар.
На прашањето на „Сведок“, зошто Судскиот совет не реагирал во сите случаи кога Обвинителството за организиран криминал обвини и уапси десетина судии, или за апсењето на прекршочните судии, за Караџоски „тоа се случило во минатото“.
Првиот човек на Судскиот совет не одговори ниту на прашањата како може УБК да не спроведува судска наредба и дали на тој начин не се нарушува судскиот интегритет, бидејќи не можел да коментира изјави од телевизија, а во меѓувреме слушнал и други изјави дека УБК соработува со СЈО.
Тој отфрли и секаков коментар околу прислушуваните материјали, бидејќи, вели, не биле докажани.