Почесниот претседател на ВМРО, Красимир Каракачанов, поранешен вицепремиер и министер за одбрана на Бугарија за БНТ изјави дека околу 24 мај дел од владата на чело со премиерот Кирил Петков и партијата „Продолжува промената“ ќе направи национално предавствo.
– Имате одлука на бугарската влада од 2019 година, одлука на парламентот од 2019 година, одлука на Советот за национална безбедност под претседателот од 2020 година, имаше и одлука на Советот во јануари оваа година. Бугарскиот став е јасен: компромиси за темата Македонија не се прават додека не се промени политиката на Скопје кон Бугарија – категоричен е Каракачанов.
Тој нагласи дека за целото бугарско општество веќе е јасно дека „Кирил Петков не само што не разбира за што се работи, туку има преземено обврски“.
– Во моментов се обидува да направи национално предавство за да го одработи тоа што некој го извади од никаде и го направи премиер на Бугарија. Тоа веќе им е јасно на сите – рече Каракачанов.
Каракачанов додаде и дека „сите сакаме да имаме партнери од ЕУ на Балканот, но членството во ЕУ значи исполнување на критериумите“.