Разрешениот директор на Клиниката за кардиохирургија, д-р Сашко Јовев денеска во присуство на вработени и негови колеги од Клиниката рече дека за првпат земал боледување во 35 години работење, но го земал поради притисоци кои што ги имал минатата недела, пред разрешувањето.
„Имав притисоци дека сум направил грешка во самиот протокол за настанот при отворањето на нова хибридна сала, единствена во регионот. Уредно беа поканети сите, но единствено министерот за здравство не дојде, сметајќи дека нешто подоцна е дадена поканата за него, а порано за премиерот. Јас не можев да се мешам, тоа е Влада и они решаваат меѓусебе, а јас се најдов на средина. На крајот јас испаднав жртва, но и Кардиохирургија. Даваме лоша лекција на сите млади после нас“, рече Јовев на прес-конференција за неговото разрешување од страна на првиот човек во здравството, Фатмир Меџити.
„Поддржан сум од СДСМ, но не сум партиски кадар. Заменик-министерката ме поддржа, а од премиерот не сум добил известување и сметаше дека не треба да се меша во нашата работа со министерот. Самата партија и нивните структури сериозно ми дадоа поддршка и застанаа на моја страна“, кажа Јовев за медиумите.
„Иницијалната каписла може да биде некоја суета или недоразбирање. Ние имаме чесно и интелектуално портфолио. Ова не почна политичко, но како се движи, може да има беспотребен политички пазар“, потенцира докторот, кој доби огромна поддршка и од пошироката јавност.
Во текот на изјавата на Јовев за медиумите неговите колеги го скандираа неговото име изразувајќи му поддршка. Дојдоа и пациенти пред Клиниката за кардиохирургија, каде изразија поддршка за докторот. Тие посочија дека благодарение на интервенциите од Јовев, сега се живи и здрави. На протестот излегоа и вработени од Клиниката. Дел од нив, сметаат дека ваквото постапување е бркање од дома на разрешениот директор.
На прес-конференцијата исто така беше објавено дека во решението за разрешување на Јовев од директорската функција како причина е наведено дека за 2022 година тој поднел исплатни листи за лекарски дежурства на Клиниката за кардиогирургија кои не биле одобрени од министерот. Јовев рече дека организацијата на дежурства не е во домен на министерот. Тој го повика Министерството за здравство и Владата да ја преиспитаат одлуката за неговото разрешување. Во емотивниот настап рече и дека „во оваа држава не се простува успехот“ и дека се гази по стручните достигнувања на успешните луѓе.