Поранешното раководство не реагирало навреме и не поднеле никаков приговор или договор со странката за да не го оштетат буџетот на општина Тетово, со единствена цел, да ги искористат евентуалните пазарења што можеле да се направат со странката, изјави Касами.
Градоначалникот на Општина Тетово, Биљал Касами, денеска на прес конференција посочи дека поранешното раководство на општина Тетово буквално уништило сѐ и дека поднеле кривична пријава против поранешната градоначалничка Теута Арифи и нејзин близок функционер, против судија и адвокат, поради сомнение дека ги злоупотребиле службените овластувања и положба.
– Штетата што ја направија на тетовските даночни обврзници е неопростлива. На пример, само во еден случај кога вредноста на експропријацијата била 3 милиони денари, сега каматата за оваа сума е 65 милиони денари. Инаку, овој случај датира од 80-тите години, а повторно бил активиран во 2015 година, за кој сите судски одлуки се позитивни. Се сомневаме дека претходното раководство намерно не го обжалило решението, за кое денеска општина Тетово плаќа камата и со тоа не само што се оштетува буџетот на општината, туку и на граѓаните. Затоа, денеска свикавме прес-конференција за да ја информираме јавноста дека ние како општина поднесовме кривична пријава против поранешната градоначалничка и нејзин близок функционер, против судија и адвокат, поради сомнение дека ги злоупотребиле службените овластувања и положба, со што е оштетен буџетот на општина Тетово во износ од 68 милиони денари. За овој случај, од добивањето на мандатот само за камати плативме над 29 милиони денари или приближно половина милион евра, вели Касами, објави телевизијата 21.
Според него, вредноста на овој предмет, којшто се однесува на имот чија експропријација била извршена многу порано, била околу 50 илјади евра.
– Поранешното раководство не реагирало навреме и не поднеле никаков приговор или договор со странката за да не го оштетат буџетот на општина Тетово, со единствена цел, да ги искористат евентуалните пазарења што можеле да се направат со странката. Ние не сакаме да се претставуваме како жртва , ниту се обидуваме да шпекулираме за многуте пропусти и законски прекршувања направени во времето на претходните локални власти, туку само сакаме да ги откриеме фактите и аргументите. Се обидуваме да им објасниме на граѓаните каде завршиле нивните пари и зошто општината е во огромни долгови. Граѓаните имаат право да знаат зошто е блокирана сметката на Општина Тетово, а со тоа се кочи нормалното функционирање на локалната власт, вели Касами.