Каталонскиот парламент денеска прогласи независност од Шпанија, а веднаш потоа шпанскиот Сенат ја укина автономијата на Каталонија и одобри воведување директна управа во тој регион.
Членовите на каталонскиот парламент ја донесоа одлуката на тајно гласање, кое го бојкотираа пратениците на опозицијата.
Парламентот гласаше за покренување конститутивен процес за одвојување од Шпанија, со 70 гласови „за“, 10 „против“, а двајца се воздржаа од гласање.
Голем број граѓани кои се собраа пред зградата на Парламентот во Барселона со овации ја поздравија таа одлука.
Само неколку минути откако каталонските власти прогласија независност на областа од Шпанија, Сенатот во Мадрид и одобри на Владата на шпанскиот премиер Маријано Рахој да воспостави директна контрола врз Каталонија.
За укинувањата на овластувањата на каталонските власти, 214 членови на шпанскиот Сенат гласаа „за“, 47 беа „против“, додека еден член беше воздржан.
Сега се очекува Рахој да да го повика кабинетот со цел да се усвојат првите мерки за власт над Каталонија. Мерките предвидуваат распуштање на Владата во Барселона и преземање директна контрола врз полициските сили во Каталонија.
Според Одлуката на Сенатот во Мадрид, ниту владата во Барселона веќе нема извршна надлежност во Каталонија.
По гласањето во каталонскиот Парламент, со кое областа прогласи независност од Шпанија, шпанскиот премиер Маријано Рахој повика на смиреност.
– Барам сите Шпанци да останат смирени. Владеењето на правото ќе ја обнови законитоста во Каталонија, наведе Рахој на неговиот Твитер налог, само неколку минути откако Каталонија прогласи независност.
Реакции за независноста на Каталонија
Каталонија прогласи независност но патот до вистинска Република Каталонија ќе биде долг. Првите реакции не се охрабрувачки за новата република. Претседателот на Советот на ЕУ Доналд Туск изјави дека за Брисел нема промени и главниот соговорник за ЕУ останува да биде Мадрид. Сепак, малку подоцна тој ја ублажи оваа изјава изјавувајќи дека од Мадрид очекува да ја користи силата на аргументите а не аргументот на силата. Очигледно е дека Туск и ЕУ не сакаат повторно да видат било какво насилство во Каталонија како што тоа беше случај на 1 октомври, денот на каталонскиот референдум кога полицијата испратена од Мадрид повреди над 800 лица обидувајќи да го спречи гласањето.
Реакција дојде и од Вашингтон кој изјави дека ја поддржува унитарноста на Шпанија