Каталонскиот регионален парламент прогласи независност од Шпанија.
Гласањето беше 70 за и 10 против, а беше бојкотирано од опозициските пратеници.
Шпанскиот премиер конзервативецот Мариано Рахој утринава побара од Сенатот дозвола да го смени претседателот на Каталонија Карлес Пучдемон и целата влада на овој регион.
Рахој побара “смена на претседателот на регионот Каталонија, потпретседателот и советниците” на регионалната влада. Говорот на Рахој беше пропратен со аплауз на сенаторите од кои најголем дел се членови на Народната партија на Рахој. Целта на ова барање е да се дозволи одржување на регионални избори во следните 6 месеци.
Мерката е без преседан во последните 40 години во Шпанија и значи дека Мадрид ќе раководи со Каталонија.
Мирен отпор на Каталонците
Нема сомнение дека оваа драстична мерка на Мадрид ќе донесе силен отпор во Каталонија, но отпор кој биде мирен и ќе се состои од граѓанска непослушност. Каталонија е силно приврзана на својата регионална автономија што ја доби по падот на диктатурата на Франко во 1975 година.
Мерките се однесуваат не само на смена на регионалната влада туку и на полицијата и каталонските аудио-визуелни медиуми.
На овие најави веќе реагираше Европската федерација на новинари која побара од Мадрид да не се меша во независноста на медиумите.
Повеќе организации во Каталонија, поддржувачи на независноста, ги повикаа граѓаните на протести со слоганот: “Републиката чека, треба да ја браниме”.
Народната партија на Рахој не е многу популарна во Каталонија кадешто на последните избори доби нешто повеќе од 10 проценти гласови. Новите мерки ќе придонесат за намалување на рејтингот на оваа партија во Каталонија. Според многу набљудувачи, овие мерки ќе го зајакнат барањето за независност и кај оние Каталонци кои не се приврзаници на осамостојувањето.
Мерките на Мадрид се “агресија”
Пучдемонт веќе изјави дека мерките на Мадрид во себе кријат “желба за одмазда” на државата кон непослушниот регион. Тој вчера одби да свика регионални избори со што практично ја затвори портата што можеше да води во дијалог помеѓу двете завадени страни.
Каталонскиот Парламент денес го даде својот одговор на мерките на Мадрид. Сепаратистичките партии, и од левата и од десната страна на политичкиот спектар, кои имаат 72 пратеници од вкупно 135, мерките на Мадрид ги сметаа за “агресија”.
Каталонија е најбогатиот шпански регион и учествува со 20 проценти во шпанскиот бруто внатрешен производ а еден и од најбогатите во ЕУ.
Засега ЕУ одлучи да не интервенира во оваа криза сметајќи дека станува збор за внатрешна работа на Шпанија. Но загриженоста на ЕУ за настаните во Шпанија е голема.
Шпанскиот премиер Маријано Рахој претходно изјави во Сенатот дека е враќањето навладеење за враќање на “законот, демократијата и стабилноста” во Каталонија.