Обвинителките од СЈО Катица Јанева и Ленче Ристоска соопштија дека и по 12 часа откако влегоа со судски налог во УБК, немаат пристап до документите кои се предмет на истрага во рамки на истрагата за случајот „Пуч“.
„Ние нема да си одиме се додека не постапиме по судските наредби.Јас ќе бидам цела вечер тука се додека можам да издржам“, изјави Специјалната обвинителка Катица Јанева.
Обвинителката Ристоска објасни какви документи бараат од УБК.
„Ние денес добивме наредба од Кривичниот суд за да ги добиеме сите податоци за броевите кои биле маркирани во УБК и се сомневаме дека се во моменталните системи во УБК. И наша цел е да видиме дали се таму. На наше жалење, раководните органи велат дека немаат ни технички, ни човечки ресурси за да може да пристапиме во системите за прислушување“, рече Ристоска.
Јанева изјави дека е разочарана од односот на раководството во УБК, како и од директорот на БЈБ Митко Чавков кој постојано бил до обвинителите и истражителите, под изговор дека се грижел за полицајците, а дополнителниот заменик министер Оливер Андонов воопшто не се ни поздравил со тимот од СЈО.
Обвинителката Јанева изјави дека се организирани во повеќе групи за дежурства и во УБК ако треба ќе останат и до 1 јануари следната година, се додека не ги добијат бараните документи.