Заменик шефот на грчката дипломатија Јоргос Катругалос вели дека е умерен оптимист во однос на перспективите за постигнување решение на прашањето за името.
Катругалос, во интервју за грчката ТВ Скај, како што пренесува МИА, вели дека топката е на македонска страна, затоа што на Грција не ѝ се брза за решение, ниту има притисоци, ниту потреба од забрзување на процесот.
– Во однос на тоа дали може да се очекува решение, јас и понатаму сум, како што бев и на почеток, умерен оптимист дека постои прозорец за можност, а постои и соодветен напредок за доста од прашања што беа поставени од почеток. Топката, во суштина е на теренот на другата страна. Ние, имаме национален интерес да се реши, но немаме некој особен притисок. Ние не сме нетрпеливи да се реши, вели Катругалос, потенцирајќи дека сепак за Атина е важно да има решение.
Катругалос вели дека промената на Уставот е дел од решението, „не може да постои решение без тоа и тоа е прашање за кое другата страна има друг став“.
-Сакаме да се регулираат сите прашања преку еден Меѓународен договор, ова беше и нашиот првичен став, но и прашањето за ревизија на Уставот. Затоа што сакаме да се исфрлат сите прашања поврзани со иредентизмот, да имаме целокупно решение, што ќе се имплементира за сите, ерга омнес, но сакаме да има и трајни карактеристики, а тоа може да го обезбеди само промена на Уставот, објасни Катругалос.
Портпаролот на грчката Влада, пак, Димитрис Ѕанакопулос во интервју за ТВ Алфа, одговарајќи на прашањето за пишувањето во медиумите за евентуален грчки план „Б“ за потпишување договор со меѓународните организации, без да мине низ парламентите на двете земји, рече дека „не постои никакво меѓународно прашање што може да се реши без меѓународен договор“, што содржи конкретни обврски за двете страни.
-Што правиш кога треба да решиш еден билатерален проблем? Се договараш за еден правно обврзувачки текст што ги опишува обврските на двете страни. Односно, грчката страна ќе го признае соседот под името што ќе биде договорено, а соседот ќе се согласи. За грчката страна да го признае ова име и да преземе конкретни обврски една од нив ќе треба да е, како што многупати имаме јасно кажано, е промена на уставното име. Поранешната југословенска Република Македонија ќе ја преземе правната обврска да го промени уставното име, доколку сакаме да стигнеме до решение, вели Ѕанакопулос, говорејќи за грчката ТВ Алфа.
Во однос на тоа дали Атина бара промена Уставот само поради името или, пак, смета дека треба да се направат измени и на одредени членови, Ѕанакопулос објаснува дека постојат различни правни толкувања и тоа е дискусија што се води на политичко и правно ниво.