Полицијата во Флорида соопшти дека осум лица биле застрелани за време на настанот по повод Денот на Мартин Лутер Кинг помладиот, а една од жртвите е во критична состојба.
Канцеларијата на шерифот потврди дека сите жртви во пукотницата се возрасни.
Пукањето се случило во паркот Илоус Елис вчера попладне во 17:20 часот за време на шоуто за автомобили и семејниот забавен ден, на кој канцеларијата на шерифот соопшти дека присуствувале повеќе од 1.000 луѓе.
„Повеќе луѓе беа застрелани. Имаше некаков вид несогласување меѓу две страни, и за жал, тие избраа да го решат тоа со пиштоли“, рече заменик началникот на округот Сент Луси, Брајан Хестер.
Полицијата соопшти дека четири лица, вклучително и едно дете, се здобиле со повреди кои не се опасни по живот за време на метежот што уследил.
„Беше масовен хаос, како што можете да замислите, кога одекнаа истрели“, рече Хестер. „Имаше уште илјада луѓе овде на настанот, и кога одекнаа истрелите, луѓето почнаа да бегаат на сите страни“.
Видеото добиено од камерите на местото на настанот покажува луѓе како се фрлаат на земја, или трчаат и се кријат зад автомобилите, вклучително и жена која бега додека држи бебе.
„Навистина е тажно на прославата на некој што ги претставуваше мирот и еднаквоста, несогласување да резултира со употреба на оружје и насилство за да се реши тоа несогласување“, рече Хестер. „Многу невини луѓе се повредени а не беа дел од несогласувањето“, рече тој.
Извор: Асошиејтед Прес