„Воената интеграција на Северна Македонија во НАТО се одвива според планот и се очекува да заврши до крајот на оваа година“, му посочила министерката за одбрана Радмила Шеќеринска на Командантот на силите на САД за Европа и Африка, генерал Кристофер Каволи кој е во работна посета на Република Северна Македонија. Таа се заблагодарила за ангажманот на инженериската единица на Армијата на САД во подготовката на полигонот Криволак за вежбата „Одлучен удар 21“ која деновиве се одвива на полигонот.
„Развојот на Криволак е заедничка цел, на која Армијата на Северна Македонија и Армијата на САД работат сојузнички“, рече министерката.
Членството на Северна Македонија во НАТО и отворањето на преговорите со Европската унија се од клучно значење за безбедноста и стабилноста во регионот, било потенцирано во разговорите.
На средбата, како што се посочува во соопштението, стана збор за важноста на развивањето на регионалната соработка меѓу сојузниците и за потребата од што побрзо разрешување на разликите во рамките на евро-атлантското семејство како дел од посветеноста на заедничката безбедност.
Од страна на генералот Каволи бил истакнат интензивниот интегративен прогрес кој го спроведува Армијата по полноправното членство во НАТО, притоа потенцирајќи дека тоа е резултат на одличната подготвеност и залагања на Армијата и Министерството.
„Со своето учество и придонес во НАТО мисиите и регионалната безбедност, Северна Македонија е пример за целиот регион“, оценил Каволи.