Општо познато е дека фудбалерите заработуваат пари од кои боли глава. Чести се вестите за разноразни луксузирања, скапи хотели, автомобили, куќи, станови, вили итн. Една од потврдите за нивните богати догвори во кои неретко се вклучени и бизарни клаузули се и казните што ги плаќаат за недисциплината и непридржување кон „куќниот ред“.
Таков пример доаѓа од Лондон, поточно, од соблекувалната на Челзи во која Френк Лампард закачи „ценовник“ за непочитување на правилата на однесување и сумата што паѓа на товар на поединец при прекршување на правило на игра. Најскапо е доцнењето на тренинг за што се одбиваат 20.000 фунти од плата. 
Втора највисока казна (10.000 фунти) е за непријавување на болест, настинка или повреда пред слободниот ден или најдоцна до час и пол до наредниот тренинг. Оној кој ќе реши да не се врати со тимот по натпревар, а притоа не го известил менаџерот ќе биде „полесен“ за 5.000 фунти. Казна од 2.500 фунти е пропишана за доцнење на собирите на ден на натпревар, но и за доцнење на лекарски третман. Доцнење на клупски состанок чини скромни 500 фунти, меѓутоа по минута.
Лампард, кој ужива статус на легенда на „Стемфорд Бриџ“, се врати меѓу лондонските „сини“ летоска и повеќе од добро му оди засега во дебитантската сезона како нивни менаџер. По 12 кола во Премиерлигата, Челзи го дели второто место со Лестер со 26 бода, осум помалку од лидерот Ливерпул кој сè уште е без пораз. Покрај тоа, екипата е во игра и за осминафинале во Лигата на шампиони преку групата Х во која досега собраа вкупно 7 бода колку и Валенсија и Ајакс.