Со политичка волја сè може да се направи, може да избереме уставни судии до почетокот на колективниот годишен одмор на пратениците во август, блокадите никому не му се во интерес, им порачува пратеникот Арбен Зибери на колегите пратеници од опозицијата во изјава за Нова, како одговор на нашето прашање за причините за застојот во работата на Комисијата за избори и именувања и неизвесноста дали Уставниот суд после неколкуте апели пратениците да си ги завршат обрските ќе може да функционира во полн состав барем од септември.
Пратениците досега за уставен судија го предложија Фатмир Скендер, актуелен судија во Апелацискиот суд Скопје, а расправа за предлогот на СДСМ Татјана Васиќ-Бозаџиева, се одржа на една седница на која опозицијата изнесе многу забелешки за предлогот велејќи дека Васиќ е одличен кадар за Уставен суд, ама како администратор кој стручно ќе помага во работата, а никако како судија со оглед на тоа што нема искуство што треба да го има избраниот уставен судија како што е професорката Родна Живковска која `и била ментор на Васиќ. Професорката Живковска не доби поддршка од владејачкото мнозинство и не беше избрана.
– Пребродивме една криза со пандемијата, тогаш имаше застој во континуираното функционирање на законодавниот дом, така што сметам дека сега непотребни се било какви застои во работењето. Ако зборуваме дека сме во кризен период, не води никаде ако наместо да ги решаваме проблемите, одиме кон уште еден застој како што се барањата на опозицијата за предвремени избори, вели Зибери.
Тој објаснува дека во расправата биле најавени дури четириесетина пратеници од опозицијата, а овој факт секако дека влијае на ефективноста на собраниската комисија која по речиси една година откако Уставниот суд работи со намален и недоволен број судии, на 13 мај годинава ја започна процедурата за избор на нови уставни судии.
– Очекувам да избереме уставни судии во разумен рок без да го попречиме правото на дебата, вели Горан Мисовски, потпретседател на Собранието.
Тој потсетува на разговорите со опозициските пратеници во кои имало начелна согласност да не се одолговлекува изборот на судиите за да се овозможи непречена работа на Уставниот суд.
На утрешната седница се очекува да продолжи расправата за предлогот Татјана Васиќ-Бозаџиева да биде уставен судија, па потоа следи расправа за останатите кандидати на опозицијата – универзитетскиот професор Саво Климовски, судијата во пензија, Бранко Секуловски, обвинителот Тодор Витларов, судијката од Управниот суд, Весна Јовановска и Војислав Димовски, јавен обвинител од Основното јавно обвинителство во Охрид. На крај пратениците треба да ја заокружат комисиската расправа со предлогот на власта актуелниот јавен обвинител Љубомир Јовески да биде избран за член на Уставниот суд.
Откако Комисијата за избори и именувања ќе избере тројца кандидати, потоа треба да бидат изгласани и на пленарна седница.
Претседателката на Уставниот суд Добрила Кацарска во обид да ја поттикне собраниската процедура за избор на судии неодамна се сретна и со шефот на државата Стево Пендаровски, со премиерот Димитар Ковачевски и со претседателот на Собранието Талат Џафери во врска со блокадата на изборот на четирите уставни судии и предупреди дека на државата `и се заканува уставна криза.
Уставниот суд од предвидените девет, работи без четворица судии на кои им истече мандатот. Во нецелосен состав е околу една година откако кон крајот на мај лани им истекоа мандатите на тројца судии – Сали Мурати, Елена Гошева и Никола Ивановски. Кон средината на јануари годинава, пак, му заврши мандатот и на судијата Јован Јосифовски.
С.М.