Вртелешките поставени на кејот на Вардар ќе бидат отстранети, јавува порталот СакамДаКажам.
Двете вртелешки ги постави поранешниот градоначалник, Коце Трајановски. Едната во близина на седиштето на Телеком, другата спроти Министерството за надворешни работи.
Од кабинетот на актуелниот градоначалник, Петре Шилегов информирале дека тие ќе се отстранат бидејќи едната го блокира кејот на Вардар, а другата нема доволно посетители.
Се размислувало за нови локации, односно паркот во Чаир и паркот на езерата во Аеродром.
„Втората локација пред МНР е несоодветна поради тоа што нема фреквентност на движење. Каруселите се отстрануваат по барање на велосипедистите коишто бараат да се ослободи поголем простор за пешаци и велосипедисти на тие локации. Исто така, поради близината на локациите, бројот на посетители на двата карусела остана приближно ист со бројот на посетители кои досега го користеа првиот карусел лоциран на плоштадот Македонија, односно незначително се зголеми, а со тоа и приходот од двата карусела остана речиси ист, а се подели на два реквизита, додека пак трошоците кои се создадоа за друштвото се значително поголеми“, информирале од Кабинетот на Шилегов.
Вртелешката кај Телеком беше поставена во 2013 година во рамките на проектот Скопје 2014.
Чинеше околу 160.000 евра, а ја набави ЈП „Паркови зеленило“ со пари кои му беа префрлени од буџетот на Град Скопје.
Втората вртелешка, на плоштадот Пресвета Богородица беше поставена минатата година во јули иако првично од ЈП „Паркови и зеленило“ велеа дека ќе стои на Плоштадот Филип Втори.
Таа е поскапа од првата и за неа Град Скопје потроши 187.000 евра.