Кембриџ Интернешнал уште во 2016 година ја информирало Владата, односно тогашниот заменик министер за образование Спиро Ристовски дека е потребно повеќе време за да се реализира Кембриџ програмата за средните училишта. Ист таков допис од Кембриџ испратиле и до министерката Дескоска, откако таа стапила на функција. Ова денеска на прес-конференција по повод 100 дена работење го изјави Дескоска.
НОВА ТВ се обиде телефонски да го добие Ристовски, за да го прашаме, зошто и по предупредувањата од Кембриџ, дозволил да се имплементира оваа програма, но тој не одговараше на нашите повици.
„Во второто писмо Кембриџ Интернешнал“ укажува дека е потребно време од 18 месеци до две години и за адаптација на учебниците, а со оглед на тесните рокови во кои тоа се прави во Македонија, процесот содржи слабости. За жал во тој процес воден од претходната Влада, процес во кој биле игнорирани предупредувањата од самиот Кембриџ, штета им била нанесена и на учениците и на наставниците, но и на угледот на Кембриџ. За тоа кој имал корист од тоа, оставам јавноста да суди“, рече Дескоска.
Министерката исто така рече и дека во тек е процесот на ревизија на учебниците во основно и средно образование. За оваа цел, министерството направило онлајн прашалник кој е доставен до училиштата, со цел наставниците да го дадат своето мислење за квалитетот и потребата од промени на учебниците по кои предаваат. Рок за да го пополнат прашалникот наставниците имаат до 15 овој септември, а потоа како што најави министерката ќе се формираат групи кои ќе ги анализираат одговорите од наставниците.
Дескоска рече дека досега се повлечени два учебника, Граѓанско образование за осмо одделение и Општество за четврто одделени. За овие предмети Бирото за развој на образованието подготвува прирачници според кои наставниците ќе можат да предаваат.
Одговарајќи на новинарско прашање дека во некои училишта недостигаат учебници кои државата бесплатно треба да им ги дава на учениците, Дескоска рече дека „сите директори на училишта треба до министерството да достават список на број на учебници кои недостигаат“.
„Ова е малку покомплексна ситуација, затоа што освен барањата на директорите за учебници, до нас стигнаа и неколку фотографии на кои се гледа дека во некои училишта во затворени простории има купишта книги кои не им се доделени на учениците. Во една ситуација од директор на училиште побараа учебници повеќе отколку што имаат ученици. Дополнително ја анализираме оваа ситуација, за да најдеме решение кое нема да биде на штета на државниот буџет“, рече Дескоска.