Ракометарите на Вардар ја завршија 2016 година со пораз. Кјелце славеше со 27:24 (полувреме 15:12) над „црвено-црните“ кои по гостувањето во Полска го загубија и првото место во групата Б во Лигата на шампиони. Нов лидер во конкуренцијата е токму европскиот првак со 14 бода, еден повеќе од ПИК Сегед на второто место и два од македонскиот титулар.
Вардар одигра натпревар со најмалку постигнати голови во оваа сезона. Карачиќ и Алекс Душебаев реализираа по пет, по трипати во листата на стрелци се впишаа Циндриќ, Дибиров и Марсениќ. Одличен меѓу стативите беше Страхиња Милиќ со 13 одбрани меѓу кои и три пенали што, сепак, не беше доволно за избегнување на пораз во меч во кој домашните беа постојано во водство или, во најмала рака, во резултатски егал.
За разлика од нив, речиси, сите противнички играчи ја тресеа вардаровата мрежа. По четири постигнаа Агинагалде, Штрлек и Рајхман, Јуркевиц и Ѓукиќ погодија по трипати за полскиот клуб кој успеа да се реваншира за убедливиот пораз во Скопје пред три недели.
Настапите во шампионската Лига за вардарци продолжуваат на 11 февруари со дуел против ППД Загреб на домашен терен.