Весникот „Њујорк тајмс“ пишува дека Кијив подготвува целосна евакуација доколку градот остане во целосен мрак.
Станува збор за град со три милиони жители, а наводно веќе постои комплетен план за оваа неверојатна опција. Околу 40 отсто од енергетската инфраструктура веќе е оштетена или уништена при руските бомбардирања.
Доколку Русија продолжи со вакви напади, јасно ни е дека би можеле целосно да останеме без струја, изјави Роман Ткачук, владин претставник од Кијив.
На градските власти им беше кажано дека ќе имаат предупредување околу 12 часа однапред дека системот е на работ на откажување. Во тој случај, како што рече Ткачук, луѓето ќе бидат известени да си заминат.
Но, засега, вели тој, ситуацијата е таква што се уште може да се управува. Сепак, евентуалниот целосен прекин на електричната енергија, се разбира, би донел многу други проблеми. Значи во тој случај не би имало вода или многу други работи кои зависат од струја.
Градоначалникот на Кијив, Виталиј Кличко синоќа за украинската државна телевизија изјави дека градот се соочува со можни недостатоци на струја и прекини во водоводните и топлинските мрежи предизвикани од руските напади, поради што жителите на главниот град треба да создадат резерви и да размислат за привремено иселување.
Тој го опиша ова како најлошото можно сценарио. „Правиме се што можеме за да се погрижиме работите да не дојдат до тоа“, истакна Кличко.
Ако сакаме да бидеме отворени. Нашите непријатели прават се што можат за да го остават овој град без греење, без струја и без снабдување со вода – накратко, сите да умреме, рече градоначалникот на Киев.
Тој процени дека во градот има околу три милиони луѓе, вклучувајќи 350.000 внатрешно раселени лица.
Кијив се обидува да ја стабилизира својата електрична мрежа со повремени исклучувања што оставаат делови од градот во мрак по неколку часа и поставува 1.000 помали топлани во случај да се прекине топлинската мрежа.
Кличко, познат како поранешен светски шампион во бокс, го обвини рускиот претседател Владимир Путин дека сака да ја уништи Украина како нација. „На Путин не му требаме ние Украинците, туку му треба регионот, му треба Украина без нас“.
На 24 февруари Русија започна воена агресија врз соседна Украина и оттогаш прогласи четири региони на југ и исток како дел од руската територија.