Речиси две третини од видовите на кактуси ќе бидат изложени на помалку гостоприемливи клими во следните децении, бидејќи глобалното затоплување ќе се интензивира, според новото истражување кое е спротивно на вообичаеното верување дека овие пустински растенија ќе напредуваат кога ќе биде потопло.
До 2070 година, повеќето видови кактуси би можеле да исчезнат поради климатските промени и тоа три пати повеќе отколку сега, истакнуваат научниците во написот објавен во списанието Nature Plants. Речиси 1.500 видови кактуси кои се раширени низ светот живеат во различни клими, од пустини во низините до високите Анди, од екстремно суви екосистеми до влажни тропски шуми.
Главна закана за кактусите во моментов е проширувањето на земјоделството, со уништување на почвата, губење на биодиверзитетот и нивно берење за различни намени. Дури и без климатските промени, кактусите се „една од најзагрозените групи организми на планетата“, велат научниците, предупредувајќи дека повеќе од 30 отсто од видовите кактуси се во опасност од исчезнување.
Се посочува дека за четири до пет децении, речиси 25 проценти од видовите кактуси може да се најдат во клима која не им одговара.
Претходните истражувања покажаа дека фотосинтезата е отежната ако глобалната температура се зголеми за само два Целзиусови степени. Просечната температура на површината на Земјата, вклучувајќи ги и океаните, веќе е за 1,1 степен повисока отколку во индустриски времиња, а само на копно за околу 1,7 степени, пренесува хрватската агенција Хина. (Р.Н.)