Менаџерот на Ливерпул, Јирген Клоп со поддршка за капитенот на тимот Џордан Хендерсон по неговата одлична партија во триумфот над Саутемптон со 3:1 на стадионот „Сент Мери“ во рамки на 33. коло во Премиерлигата.
Англискиот репрезентативец влезе во игра при резултат 1:1 и беше најзаслужен за пресвртот. Најпрво му асистира на Мохамед Салах за 2:1, а потоа го постигна третиот гол за својот тим во натпреварот, негов прв во дресот на „црвените“ од септември во 2017 година.
Фудбалерот на Ливерпул честопати е мета на критики од фановите и во медиумите, но според Клоп тоа е поради големите очекувања од него. Хендерсон во 2015 година наследи не било кој, туку легендата на клубот, Стивен Џерард за што во негова одбрана застана менаџерот на екипата.
„Овој гол значи многу за него, како и за нас. Тој е фантастично момче. Хендо не добива многу пофалби, а брилијантен е. Тој е наш капетан, тој има фантастичен карактер. Ако напишам книга за него, ќе има 500 страници. Најтешката работа во фудбалот во текот на изминатите 500 години е да го замениш Стивен Џерард. Луѓето мислат дека ако тој не е Стиви, тој не е доволно добар, додаде Клоп.
Ливерпул е лидер на премиерлигашката табела со 82 бода, два повеќе од „граѓаните“ кои имаат и меч помалку. „Црвените“ во вторник ги очекува и дуел на домашен терен против Порто во четврт-финалето во Лигата на шампиони.