Трагично починатата кошаркарска ѕвезда Коби Брајант и Пауло Кoељо работеле на заедничка книга за деца, но бразилскиот писател ги избриша нацрт книшките по смртта на Брајант во хеликоптерската несреќа, јавуваат западните медиуми.
Кoељо (72) тврди дека тој и Брајант (41) разговарале за проектот уште од 2016 година, кога петкратниот НБА-шампион со Лос Анџелес Лејкерс ја заврши 20-годишната кариера. Книгата почнале да ја пишуваат пред неколку месеци. Меѓутоа, Коељо, како што вели, не сака да ја заврши без својот партнер.
„Го избришав нацртот, оти не гледам никаква смисла во објавувањето книга без него. Тоа не би значело ништо релевантно ни за него, ни за неговото семејство. Тоа не значи дека еден ден нема да пишувам за нештата кои ги научив од Коби и за тоа како тој беше човек поголем од животот. Сепак, книга за деца повеќе нема смисла“, изјави Коељо, кој живее во Женева.
Познатиот бразилски писател, чиишто книги се продадени во десетици милиони примероци ширум светот, рече дека идејата за книгата била – како да се инспирираат децата од загрозени семејства, односно оние од пониските слоеви на општеството, низ спорт да се изборат за своето место во светот.
„Гранити Студиос” на Брајант објави повеќе романи за средношколци и младинци, а во 2018 година и неговата автобиографија „Менталитетот на Мамба: Мојата игра“ (The Mamba Mentality: How I Play). „Мамба“ е прекарот на Брајант.