Сеад Кочан денеска го добил известувањето од Судот дека веднаш треба да започне со издржување на затворската казна од 4 години за случајот „Труст“, потврдија од Судот за НОВА.
Доколку Кочан денеска не се пријави во затворот во Идризово, судија за извршување на санкции ќе побара од МВР тој стражарно да биде пренесен во затворот.
Иако во Законот нема прецизен рок до кога треба да се чека осудениот да се јави на издржување на затворската казна, терминот „веднаш“ јасно наведува дека не се прифаќа никакво одложување.
Од МВР за НОВА ги негираа шпекулациите дека наводно полицијата вчера била повикана да го пренесе Коачн во затворот од една приватна болница каде тој наводно се лекувал.
Кривичниот совет при Основниот кривичен суд – Скопје, вчера ја одби како неоснована жалбата на Кочан со која се бараше одлагање на извршување на затворската казна.
„По разгледување и ценење на жалбата, советот донесе решение со кое жалбата ја одби како неоснована и го потврди решението на судијата за извршување санкции според кое осуденото лице е должно веднаш да се јави на издржување на затворската казна, а одлуката на советот е писмено изработена и експедирана до странките“ соопштија од Судот.
Бизнисменот Сеад Кочан е осуден на 4 години и 8 месеци затвор за „Труст“ за прикажување на лажна документација за добивање на тендер од ЕЛЕМ вреден 17 милиони евра. Освен Кочан во Труст беа обвинети и Василие Авировиќ, кој исто така беше осуден на затвор од три години, но Апелацискиот суд му ја преиначи казната во условна односно две години затвор кои нема да се извршат ако во наредните пет години не направи друго кривично дело.
Третиот кој беше обвинет во предметот, Сафет Ватиќ, доби ослободителна пресуда.
Судот одреди и конфискација на имот од околу 17 милиони евра.