Предвреме известивте за рацијата, а задоцнивте за животите на нашите деца. Зошто ги пуштивте убијците на нашите деца, да го дочекаат празникот со нивните семејства. А знаете ли каде ние ќе го дочекаме празникот? Доручек, ручек, вечера на гробишта.
Ова беа дел од прашањата и пораките кои ги упатија родителите на загинатите во пожарот во дискотеката „Пулс“ во Кочани на денешниот трет протестен марш „Задоцнета реакција“.
Родителите со слики во рацете од загинатите деца зборуваа дека рацијата била предвреме најавена, а полицајците не им помогнале во спасувањето на повредените, а конкретно една од мајките рече дека не и помогнале да го одведе детето до автомобил и стоеле со скрстени раце.
Никој не им помогнал на нашите деца, никој, да им помагале ќе беа во болница. Јас моето дете го најдов на два чекори пред вратата, уште мирисаше на парфем – рече една од мајките.
На протестот се дофрлуваше дека некои од тие што ги пуштиле се шетале во Дубаи, а газдарицата на дискотеката се шетала низ градот.
Полицијата пред време ја најави рацијата и полицајците цел час имаа чекано надвор за да ги скријат малолетниците и да ја продаваат со соучесниците на монструмот дрогата. И кога влегле, тие знаат дека било доцна. Рација не се прави најавено. Марицата кружела околу пулс од 12 30. Јавна тајна е дека дел од полицајците, инспекторите имале бенефит од тоа. Ама зошто, зошто нашите деца да платат? Тоа е болката. Сите овие деца се од чесни семејства, родителите чесно ги заработувале своите пари. Зошто баш ние, не сме соучесници ние не сакаме мито не сакаме корупција – рече една од мајките.
Едно девојче кое било во дискотеката кобната моќ сведочеше дека ги молела полицајците да помогнат, но тие не помагале.
Порачаа дека правдата мора да излезе на виделина и дека ќе продолжат да протестираат.
Ќе продолжиме да излегуваме и да ги потсетуваме челниците на оваа скапана држава дека сме тука и до наш последен здив ќе ја бараме правдата за сите починати и повредените на 16. март, бидејќи ги закопавме нашите деца поради нечии грешки, поради тоа што некој бил корумпиран, поради тоа што ја злоупотребил својата функција за пари, за корист за личен бенефит – рече една од мајките.
Пред општинската зграда излезе в.д. градоначалникот Венко Крстевски и им вети дека заедно со нив ќе се бори за правда. Кажуваа каква иднина ги чекала секој од загинатите млади луѓе, „Ова е ди-џејот“, „Ова е фудбалерот“, „Ова е модниот дизајнер“, „Ова е програмерот“….
Маршот започна од Паркот на револуцијата, а потоа насобраните се движеа кон Трговскиот центар, зградите на Општината, Полицијата и завршија пред зградата на кочанското Основно јавно обвинителство.
На денешниот собир беше порачано: „Нашите деца беа убиени од алчноста – правдата мора да излезе на виделина“!
Протестот се предводеше со транспарентот „Пулс од 2012 до 2025, истрага од 2025 до 2038, судење од 2038 до ???“
Ова е трет протестен марш што се одржува во организација на семејствата на настраданите во пожарот во Кочани.