Пријавувањето на сексуално и насилно злоставување, што тргна со скандалот со Харви Вајнштајн од онаа страна на Атлантикот, пристигна и во малиот «бриселски меур».
Портата му ја отвори европската комесарка за еднакви права Вера Јурова. Таа раскажа дека била жртва на сексуално вознемирување, ги повика сите жени да му се придружат на движењето #metoo (на англиски) и #moiaussi (на француски) и да пријават нелегално и депласирано сексуално однесување.
Во текот на конференцијата организирана од порталот Politico.eu таа изјави дека скандалот со Харви Ванјштајн е “само врв на ледениот брег” и дека овие случаи ги има на секој чекор. Но, жените не се осмелуваат да пријават бидејќи голем број од нив се чувствуваат виновни и сметаат дека тоа го заслужиле.
“И самата бев жртва на вакво насилство”, изјави таа и ги повика сите жртви да не се срамат и да го пријават насилникот.
Според неа, мора да се зајакне примената на законите против вознемирување и насилство но проблемот е и во културата па оттука мора да се работи на промена на менталитетот и да се отвори јавна дебата што ќе стави крај на културата на вознемирување што за многумина во нашите општества е сосема нормална појава.
Половина од жените во Европа се жртви на вербално, физичко или сексуално интернет насилство и злоставување, вели таа: “Треба да ја смениме перцепцијата во општеството кое смета дека тоа е нешто нормално”, изјави Јурова.
Сведочењата се множат
Оние што го познаваат “бриселскиот меур” знаат дека сексуалното вознемирување не е ништо ново во европските институции. Но, како што вели една народна мудрост, молчењето е злато па жените жртви на вакво злоставување најчесто молчат. Од страв дека нема да напредуваат во кариерата, поради приватниот живот, стравувањето дека ќе бидат навредувани или отфрлени, поради тоа што сведочењето бара изнесување на интимни детали од животот…
Британскиот новинар со македонско потекло Бојан Панчевски, дописник од Брисел за “Sunday Times”, објави примери на повеќе жени жртви на сексуално воземирување. Како смс пораката што ја добила 25годишна асистенка на еден европски пратеник. Пораката ја пратил 71годишниот Ив Кроше, поранешен француски министер за екологија. Во пораката тој ја кани на вечера и сака со неа “да ги сподели нејзините страсти, соништа и фантазии”.
Ми се повраќа од вакво однесување!
Францускиот весник “Le Figaro” ја објави иницијативата на парламентарната асистентка Жана Понте која од 2014 година собира сведочења на жени во Европскиот парламент што биле жртви на сексистичко однесување. Откако и самата била жртва на сексуално вознемирување, Понте сака да создаде женска солидарност и има запишано над 50 сведочења во кои маж, вработен во Европскиот парламент, се однесувал непристојно.
Понте ја има поддршката на нејзиниот шеф, европскиот пратеник Едвард Мартин кој на радио раскажа за збирката сведоштва што ги собира неговата асистентка.
“Еден ден Жана дојде бледа и се гледаше дека не и е добро. Ми раскажа дека еден пратеник се обидел да ја турне кон ѕидот и ја фатил за половината. Си реков: “Ма какво е ова лудило!” Таа не ми го кажа името. Сакав да одам кај него и да му кажам дека Жана не е негова роба. Ми се повраќа од ваквото однесување. Но за жал многу мажи мислат дека тоа не е ништо страшно (…) Не знаеш како да реагираш бидејќи многу мажи што вака се однесуваат се кријат зад некаков хумор”, изјави пратеникот на едно француско радио.
Поддршка на ЕУ институциите
Утре во Европскиот парламент има дебата на оваа тема. Пратениците од повеќе политички групи најавуваат дека ќе бараат од Европската комисија да им каже што и дали воопшто нешто прави за превенција на сексуалното насилство и вознемирување.
Порталот Politico.eu одлучи да ја поддржи борбата на жртвите и деновиве отвори анонимна платформа за сведочења на следниот линк:
https://docs.google.com/forms/d/e/1FAIpQLSeIKZGDXU9o4AyKSi2hihdPYiUREXBEu1n9W74hJBMex8D6QQ/viewform