Денис Тот – младиот ракометар чиј живот насилно беше прекинат во Скопје, е роден 1994 година во Ѓаково, каде ја започна својата ракометна кариера. Израснал во спортско семејство, татко му Игор е фудбалски тренер кој го води хрватскиот третолигаш ХНК Ѓаково, а брат му Борис е ракометен голман кој моментално настапува во Холандија. Веста дека починал ги шокираше сите во клубот во кој ја започна кариерата, Ѓаково, во местото каде што е роден.
„Неверојатно е тешко и неописливо болно да се напише ова. Се збогуваме со нашиот Денис Тот со скршени срца. Младото срце на нашиот Денис, нашиот легендарен ‘Ченга’, прерано престана да чука. Почивај во мир, Денис. Искрено сочувство до семејството од сите членови на РК Ѓаково“, напишаа на социјалните мрежи од неговиот прв клуб.
Татко на Денис е славонскиот фудбалски тренер Игор Тот, кој водел неколку второлигашки и третолигашки клубови, а моментално е тренер на ХНК Ѓаково-Хрватска. Игор Тот беше и прволигаш кој играјќи за Инкер, Цибалија, Вартекс и Славен Белупо, забележа 61 професионален настап и постигна 14 голови.
Ракометар е и помладиот брат на Денис, Борис, поточно голман кој моментално игра во Холандија: „Прерано не остави драг мој, почивај во мир. Без тебе ништо нема да биде исто“, напиша неговиот помал брат Борис. Ракометниот пат на леворакиот Тот до ракометниот клуб Бутел најпрвин водеше низ домашните клубови Бјеловар и Пореч, а потоа заигра во редовите на поранешниот шпански првак Адемар Леон и австриски Брук. Тој никогаш не стигнал до вратата на репрезентацијата, иако играчи од неговата генерација тврдат дека бил еден од поголемите таленти.
Иако на почетокот на кариерата беше успорен поради тешката повреда на лигаментите на коленото, во Хрватска велат дека е еден од подобрите играчи на позицијата десен бек. Со Ѓаково играше во Првата лига, беше на крајот од Купот, а таму го забележаа од големиот “Шпанец” Адемар Леон, кој го донесе во своите редови. „Навистина е голема чест да се игра во таков клуб. Мојот менаџер го заврши најголемиот дел од работата, а кога пристигна понудата на Адемар, не се двоумевме ниту една секунда. Морам да признаам дека сум малку исплашен. Јас во големиот Адемар?! Тоа прашање се уште си го вртам во главата. Но таква можност се добива само еднаш“, изјави Тот во 2015 година по големиот трансфер.
Тот, кој играше како десно крило, минатата година пристигна во ракометниот клуб Бутел од Охрид, каде мина две години и беше еден од најдобрите играчи во тимот. „По две сезони во Охрид решив да ја сменам средината. Работните услови и амбициите на клубот ме привлекоа и решив да ја прифатам понудата на Бутел. Следната натпреварувачка година сакаме повторно да победиме во плејофот, а потоа и пласман во Европа. Според мене, македонската лига е најинтересна на Балканот и мило ми е што останувам во оваа земја“, изјави Тот по потпишувањето на договорот со ракометниот клуб Бутел. Играше и за Бјеловар, Пореч и Брук во Австрија.
(Р.Н.)