Ентони Вајнер, во чиј компјутер се пронајдени мејловите на кандидатката на демократите за претседател на САД Хилари Клинтон поради што ФБИ најави дека ќе отвори истрага против неа, е поранешен конгресмен на демократите од Њујорк, кој се кандидираше и за градначалник на Њујорк.
Мејловите на Клинтон се откриени во текот на федералната истрага поради СМС порака од Вајнер до 15 голдишно девојче од Северна Каролина со сексуална содржина, објавуваат американските медиуми.
Си Би Ес објави дека мејловите на Клинтон се пронајдени на лаптопот што заедно го користеле Вајнер и неговата сопруга Хума Абедин, долгогодишна соработничка на Клинтон од која Вајнер во меѓувреме се развел.
Политичката кариера на 52.годишниот Вајнер пропадна пред неколку години поради неговите „индискретни пораки преку интернет“, пишува Њујорк Тајмс.
Нарушувањето на угледот на њујоршкиот конгресмен во јавноста започна во мај 2011 година кога од неговиот Твитер профил е објавена компромитирачка фотографија за што тој првично ја отфрлил одговорноста, тврдејќи дека е хакерски напад.
Но скандалот доби на сила кога во јавноста излегоа неговите разговори преку интернет со други жени, па Вајнер на 16 јуни 2011 година најави оставка во Конгресот на конференција во Бруклин, извинувајќи се за „личните грешки и непријатноста што ја прдизвикал“.
Пролетта 2013 година, две години откако кариерата му доживеа речиси фатален крах, Вајнер соопшти дека ќе ја продолжи трката за градоначалник на Њујорк и тогаш, како што покажуваа анкетите, имало охрабрувачки знаци дека би можел да доживее политичка преродба.
Избивањето на површина на новите пораки со непристојна содржина го присилиле да признае дека продолжил на женските поддржувачки да им испраќа фотографии и пораки, најмалку уште една година откако го напуштил Конгресот, па на изборите освои помалку од 5 отсто од гласовите.
Сопругата на Вајнер Абедин во август годинава изјави дека ќе се разведе од него после уште еден напис, овојпат во Њујорк пост, дека продолжил да разменува недозволени пораки со една жена, а помалку од еден месец потоа Дејли Мејл објави дека такви разговори имал и со 15 годипно девојче.
ФБИ соопшти дека во текот на противзаконските разговори кои Вајнер ги имал со девојчето, открил и нови мејлови за случајот со Хилари Клинтон, што предизвика потрес во претседателската кампања на само 11 дена од изборите.






