Поселена анкета од Меѓународниот републикански институт, ИРИ, покажува дека 76% од граѓаните немаат доверба во судството, додека само 23% се изјасниле дека имаат доверба. Ова беше денеска споделено на јавна дебата, организирана од Државната комисија за спречување корупција, за состојбите во правосудството кога во прашање е корупцијата. Претседателката на Антикорупциската комисија, Билјана Ивановска, рече дека 20% од граѓаните кои испратиле претставки до нив, се однесувале само за судските одлуки.
– Како потврда на ова, може да се посочат резултатите од истражувањата на Балканскиот Барометар за 2021 година спроведено од Регионалниот совет за соработка каде што е утврдено дека 81,1% од граѓаните сметаат дека судството е најкорумпирано. Ако е за утеха, овој процент е малку помал од претходната година, меѓутоа сепак е многу висок, рече претседателката на Антикорпциската комисија, Билјана Ивановска.
За разлика од неа, шефот на скопскиот Кривичен суд, Иван Џолев, во анкетата на ИРИ гледа позитивен черкор на правосудниот сектор. Ако се прашува Џолев, вината за корупција не треба да се бара само кај функционерите, туку и кај граѓаните.
– На мене ми пристапуваат голем број на луѓе, граѓани, коишто самите викаат – еј слушај, дај за оваа работа вака – така… Ајде викам – ве молам. Меѓутоа, така размислува нашиот граѓанин дека тој за нешто треба да даде, ајде благо да реча, бакшиш, сподели Џолев.
Инаку, за судските процеси кои беа пред пресуди а ќе мора да се вратат на почеток, од Кривичниот суд уверуваат дека ќе внимаваат во кои предмети ќе се назначуваат судии-поротници на кои во брзо време им истекува мандатот.